今日參加嘅 local tour 11：10 集合
所以我地瞓到 8：00 先起身食早餐
食完仲可以返房 Hea 一陣先出發
早餐係半自助式
每日有三款 main course 比住客楝
仲有自助餐區
有 salad bar
有日式早餐
有果汁
有咖啡機
我覺得其實就算唔食 main course
只係食自助餐區提供嘅嘢
都可以食得好飽
加上呢個景
二人房住一晚 HK$ 800 有找 抵到呢
下次再黎名古屋都要住返呢間酒店
集合地點喺名古屋車店太閤道 西口噴水池
去到噴水池就會見到 YOKOSO Japan Tour 嘅彩旗
同埋好多個拎住 tour 編號嘅導遊
（好似啲人接機 拎住張寫住人名嘅紙一樣）
所以好易就搵到我地嘅導遊
計埋我同 Betty
成團有三 group 香港人
導遊先生都識講簡單嘅英文
簡單嘅程度係
當佢同其他日本旅客講完一大堆日文之後
（啲日本旅客係笑到收唔到聲）
佢只會同我地講返兩至三句英文做介紹
（嗰一刻我好後悔點解當年自已唔比心機學好啲日文）
集合晒所有團友之後
導遊先生提議我地買啲乾糧上車食
因為我地個 tour 只係包晚餐
所以我地再次幫襯便利店嘅飯團
坐咗三個鐘車就到白川鄉
我地有兩個鐘嘅自由活動時間
原本已經夠凍架啦
點解仲要落雨？！
上落客嘅停車場
由停車場經過相逢橋就去到如畫一樣嘅地方
個景靚到呢
真係求其映都好似幅國畫咁
細個去旅行都有寫 postcard 比自己嘅習慣
後來發現啲 postcard 放吓放吓會唔見咗/ 爛得好快
所以好快我就放棄寄 postcard 呢個活動
不過今次有同事要求我喺白川鄉寄張 postcard 比佢
（皆因上年去聖誕老人村時
應另一位同事要求
寄咗張 postcard 返公司）
所以我喺凍到震嘅情況下都寫滿整整一張 postcard
自己睇唔到白川鄉夜景 唯有睇住 postcard 先
實在係太凍 要飲返枝熱嘅飛驒牛奶暖吓身
仲食埋飛驒牛薯餅（完全食唔出有牛肉喎）
導遊先生話 16：30 喺停車場集合
日本人出名準時
所以我同 Betty 一分鐘都唔夠膽遲
果然不出我地所料
我地明明早十分鐘就到停車場
點知一上到旅遊巴
就見到晒所有日本團友
（香港嘅團友被安排坐最後嗰幾行
由車頭行去車尾都坐無虛𥱊）
咦～香港嘅代表得我地咋喎
心諗佢地兩家人唔係遲到呀麻
最終其中一家人嘅成員真係遲到
希望佢地下個站唔好再遲啦
拜託唔好影衰香港人呀
坐多一個鐘車就到五箇山
呢到嘅屋同白川鄉一樣
都係合掌型
不過呢到夜晚會有五顏六色嘅射燈打落啲屋到
既然未夠鐘睇射燈
我地就行上山頂睇五箇山全景
但係山頂又大風又大雨
我地好快就行返落山
落山途中見到有工作人員喺到點蠟燭
冇錯 係蠟燭
呢到冇街燈
天黑之後就伸手不見五指
所以我地都係靠蠟燭嘅光去睇路
（不過佢地逐枝蠟燭咁點 幾時先點晒呢？）
行人路兩邊都冇街燈
黑到呢
最後我地發現
原來只係近停車場嗰間屋先有射燈照住
我地有嘗試過行上去間屋到睇
不過真係行唔到嗰條冰封咗嘅斜路
為咗唔好跌親
我地放棄咗欣賞呢個景點
轉去食熱辣辣嘅紅豆年糕糖水
唔知係咪我太肚餓呢
我覺得呢碗糖水好好味
請問可唔可以添食呢？
回程返名古屋終於有飯食
雖然個便當係凍冰冰嘅
（呢個時候又點可以多多要求呢）
我都將佢食清光
連我不嬲最憎食嘅魚都唔放過
22：30 左右就返到 名古屋車站
差唔多玩足 12 個鐘
呢個 tour 好抵玩
留言列表
